Avropa Birligi, ilhaq etilgen Qırımda Rusiye prezidenti saylavınıñ teşkil etilmesi ve ötkerilmesine alâqası olğan şahıslarnıñ 140 soyadı ile mektüp aldı. Bunı mart 20-de Brüsselde AB matbuat kâtibi Maya Kotsiançiç tasdiqladı, dep bildire Azatlıq Radiosı.
Kotsiançiç, Azatlıq Radiosı muhbiriniñ sualine cevap berip: «Hizmetimizniñ Ukraina Tış işleri nazirliginden, içinde qanunsız ilhaq etilgen Qırım ve Aqyarda Rusiye prezidenti saylavınıñ teşkl etilmesi ve ötkreilmesine alâqadar şahıslarnıñ adları olğan mektüp alğanını tasdiqlay bilem. Bu munasebet ile, ABniñ Qırım ve Aqyarnıñ qanunsız ilhaqını tanımağanını, ve bu sebepten de Qırım yarımadasında saylavlarnıñ ötkerilmesini tanımaycağını hatırlatmaq isteyim», – dep bildirdi.
O, al-azırda Qırımnıñ qanunsız ilhaqı ile alâqalı olaraq 150 kişi ve 38 teşkilâtqa qarşı qullanılğan sanktsiyalar aqqında hatırlattı.
AB matbuat kâtibi: «Bu tedbirlerge deñişmelerniñ kirsetilmesi, cedvelge yañı adamlarnıñ kirsetilmesine dair qararnı AB Şurası ses birligi ile qabul etecek», – dep ilâve etti.
Rusiyede prezident saylavı mart 18-de keçti. İlk malümatlarğa köre, Vladimir Putin, rekord qırıcı 76,7% neticesi ile Rusiye saylavında yeñe ve endi dörtünci kere prezident ola.
Ondan ğayrı, Rusiye akimiyeti, Ukrainanıñ itirazları ve halqara teşkilâtlar ile Ğarp ukümetleriniñ, yarımadada «saylav»nı tanımaycaqları aqqında beyanatlarına baqmadan, ilhaq etilgen Qırımda da rey berüvni ötkerdi.
Mart 19-da Ukraina TİNiniñ matbuat kâtibi Maryana Betsa, ilhaq etilgen Qırımda rey berüvniñ teşkil etilmesi ve ötkerilmesine alâqalı olğan 140 kişiden ibaret cedvelniñ ABge endi berilgenini bildirdi.
Ukraina Yuqarı Radası, Rusiye prezidenti saylavınıñ tanılmaması içün rey bermek istey.
