Link açıqlığı

Saatnıñ esas haberi

Qırımda qırımtatar faaliyetçisiniñ anasını «polisni aqaretlegeni içün» muhakeme eteler


Zarema Kulametova
Zarema Kulametova

Rusiyeniñ kontroli altında olğan İslâm-Terek (Kirovskoye) qasabasınıñ mahkemesinde qırımtatar faaliyetçisi Giray Kulametovnıñ anası Zarema Kulametovanıñ işi baqıla. Onı, Rusiyeniñ polis hadimini aqaretlegeninde qabaatlaylar. «Qırım birdemligi» cemiyet birleşmesiniñ bildirgenine köre, oturışuv diñleyiciler içün qapalı, dep ilân etildi.

Oturışuv zalına yalıñız advokat Emil Kurbedinov, qabaatlanğan hanım, qabaatlavnıñ şaatları ve Zarema Kulametovanıñ eki qızını yiberdiler. Zarar körgen polis hadimi özüne 50 000 ruble (23 biñ hrivnağa yaqın – QA) miqdarında maneviy zararınıñ ödenmesini talap ete.

Advokat Emil Kurbedinov, tışarda bu iş boyunca pek çoq diñleyici toplaşqan içün daa büyük zalnıñ ayırılmasına dair muracaat etti. Ondan ğayrı, işniñ materiallarınen tanış olmaq içün vaqıtnıñ ayırılmasına dair muracaat etilgen edi.

Polis tarafından açıq menbalarda bu adisege boyunca izaatlar berilmedi.

Fevralniñ başında Zarema Kulametovanı, polis hadimine «aqaret etken» içün polis bölügine çağırdılar.

Qırımtatar faaliyetçisi Giray Qulametov, 2012 senesinde içtimaiy ağda videorolik derc etken içün alğan on kün apis muddetinden soñ yanvar 29-da Qarasuvbazar muvaqqat izolâtorından çıqtı.

Yanvar 18-de Kremlniñ kontroli altında olğan İslâm-Terek rayon mahkemesi, yanvar 18-de Eski Qırımda evi tintilgen soñ yaqalanğan qırımtatar faaliyetçisi Giray Ametovnıñ işini baqıp çıqtı. Kulametovnı «ekstremistik artibutika ya da simvolikanıñ propagandası»nda qabaatladılar.

Qırım Rusiye tarafından ilhaq etilgen soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.

XS
SM
MD
LG