Poloniya Tış işleri nazirligi beyanat çıqarıp, ilhaq etlgen Qırımda Rusiye prezidenti saylavınıñ ötkerilmesini taqbih etti.
Mart 18-de muessiseniñ beyanatında: «Poloniya Tış işleri nazirligi, Poloniyanıñ, bütün transatlantik toplulığı ile birlikte Rusiyeniñ Ukrainağa qarşı areketlerine qatiy narazılıq bildirgenini hatırlata», – denile.
Poloniyanıñ tış siyaseti muessisesinde, «Ukrainanıñ topraq bütünligine urmet köstermek kerekliginiñ tarafdarı olğanlarını ve Qırımnı Ukraina devletiniñ bir qısmı olaraq tanığanlarını hatırlattılar.
Poloniya TİNinde: «Ondan ğayrı, bu, Rusiye tarafından yarımadada ötkerilgen prezident saylavı qanuniy sayılmaycaq, manasına kele», – dep, ilâve ettiler.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv yapıldı. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Daa evel Ukraina TİNinde, Qırımda mart 18-deki rey berüv, qomşu Rusiye prezidenti saylavınıñ qanuniyliginde şübhe doğura, dep bildirdiler.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Daniya, Estoniya, Latviya, Litva, Poloniya, Romaniya, İsveç ve Ukraina TİNleri, Qırımnıñ Rusiye tarafından ilhaq etilgeniniñ dörtünci yıllığı munasebeti ile otraq beyanatta bulundılar. Metinde, Avropa tış işleri nazirleri «Qırımğa, dünyadaki kün tertibinden ğayıp olmağa yol bermezler», denile.
