Ukrainanıñ qırımtatar asıllı rejissörı Ahtem Seitablayev Konotop meydan uruşı aqqında film çıqarmaq niyetinde.
Bunı mart 17-de Facebooktaki saifesinde Qırımtatar Milliy Meclisiniñ reisi Refat Çubarov bildirdi.
Çubarov: «Şimdiçik Varşavada «Kiborgi» filminiñ büyük muvafaqiyet ile kösterilmesinden soñ Ahtem Seitablayev, bütün icadiy taqımı, 1659 senesi iyülinde ukrainler, qırımtatarlar ve lehlerniñ birleşken küçleri Moskvanıñ ordusını tar-mar etkenleri Konotop meydan uruşına bağışlanğan tarihiy film üzerinde çalışıp başlaycağını beklemekte, dep bildirdi…», – yazdı.
Konotop meydan uruşı – 1658-1659 senesleri Ukraina-Rusiye cenkiniñ merkeziy epizodlarından biri. O, 1659 senesi iyün 28-de (yañı uslüp boyunca iyülde) bir taraftan hetman İvan Vıhovskiy ile Qırım Hanlığınıñ ordusı ve diger taraftan Moskvanıñ ordusı arasında zemaneviy Sumı vilâyetindeki Konotop şeeri yanında olıp keçti. Rusiyeniñ ordusı yeñildi ve Konotop qamaçavını toqtatıp, keri çekilmege mecbur oldı.
2017 senesi dekabr 7-de rejissör Ahtem Seitablayevniñ Donetsk ava limanınıñ imayecileri aqqında «Kiborgi» filminiñ kösterilüvi başlandı. Film bediiydir, lâkin o, aqiqiy adiseler esasında çıqarıldı. Film çekimleri Kyivde ve Çernihov vilâyetinde yapıldı. Filmniñ umumiy büdjeti aman-aman 48 million hrivna.
«Kiborgi» filmi, ülkede kösterilüvi esnasında toplağan para miqdarı boyunca Ukraina filmleri arasında rekord qırdı.
