Belgiyanıñ Baş nazirni muavini, Ecnebiy ve Avropa işleri naziri Didye Reynders ilhaq etilgen Qırımda mart 18-de ötkerilmesi planlaştırılğan Rusiye prezidenti saylavını qanunsız saya.
Reyders, Twitterdeki saifesinde: «Men, 4 yıl evel Rusiye tarafından yapılğan Qırımnıñ ilhaqını taqbih eterek, ABniñ ecnebiy işler boyunca Yüksek temsilcisi Mogerinige qatılam. Bu bazar künü, mart 18-de Rusiye ukümeti tarafından Qırımda teşkil etilgen saylav qanunsızdır», – yazdı.
Rusiye ukümeti mart 18-de ilhaq etilgen Qırımda Rusiye prezidenti saylavını ötkermek istey. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
