Ukraina prezidenti Petro Poroşenko, Rusiye tarafından ilhaq etilgen Qırım sakinleri «ertemi, keçmi Ukraina prezidenti saylavında iştirak etecekler», dedi.
Bunı mart 17-de, Kreml tarafından yarımadada Rusiye saylavı ötkerilmesiniñ arfesinde, Ukraina devletiniñ başlığı özüniñ içtimaiy ağlardaki saifelerinde yazdı.
Prezidentniñ bildirüvinde: «Qırım, Ukrainadır. Qırım sakinleri Ukraina prezidenti saylavında iştirak etmek kerek ve ertemi, keçmi iştirak etecekler. Rusiyeniñ anşlüsı yerine Ukrainanıñ qaytması olacaq – Qırımnıñ Ukrainağa ve Ukrainanıñ Qırımğa», – denile.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
