İlhaq etilgen Qırımda qomşu Rusiye prezidenti saylavında rey berüv ketişatınıñ bütün iştirakçileri ve şu cümleden saylavcılarğa uquq ceetinden munasip şekilde qıymet kesilecek. Bunı Qırım.Aqiqatqa QMC prokuraturasında bildirdiler.
QMC prokurorı Gündüz Mamedov: «Biz, elbette, ekseri insanlarnıñ saylavğa mecburen baracaqlarını köz ögünde tutamız. Uquqiy mesuliyetke, ilk evelâ, cümleden zorlav ve qorquzuv yolunen olarnıñ iştirakini teşkil etken şahıslar celp etilecek», – dep qayd etti.
Daa evel QMC prokuraturası, Ukraina qanunlarına binaen böyle areketler cinaiy mesuliyetke sebep ola bilecekler deye, Qırım sakinlerini Qırımda Rusiye prezidenti saylavınıñ teşkil etilmesinde iştirak etmemege davet etti.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde ilhaq etilgen Qırımda Rusiye prezidenti saylavınıñ tanılmaması aqqında denilmekte.
Ukraina, BMT baş sekretari Antoniu Guterriş, Telükesizlik şurasınıñ başlığı Karel van Osterom ve bütün aza devletler eyetlerine, Rusiye tarafından ilhaq etilgen Qırımda prezident saylavınıñ ötkerilmesi BMT Nizamnamesini boza, deye resmiy mektüpler yolladı.
Ukraina diplomatları, qanunsız rey berüvniñ ötkerilmesi taqdirde yarımadadaki Rusiye ukümet organlarınıñ vekillerine qarşı qoşumça sanktsiyalarnı tatbiq etmege davet eteler.
