Ukraina prezidenti Petro Poroşenko, Türkiye prezidenti Recep Tayyip Erdoğan ile telefon qonuşmasında türkiyeli meslekdeşini Ukrainanıñ suvereniteti ve topraq bütünligine daima qol tutqanı içün teşekkür bldirdi.
Bunı Ukraina prezidenti memuriyetiniñ matbuat hizmeti bildire.
Matbuat hizmeti, Petro Poroşenkonıñ sözlerine atıfta bulunıp: «Ukraina prezidenti, türkiyeli meslekdeşini qanunsız saylav neticelerini tanımamağa ve, ondan ğayrı, Türkiye vatandaşlarınıñ vaqtınca işğal etilgen yarımadadaki monitoringde iştirak etmemelerine davet etti. Qırım, Ukrainadır. Ve biz, Türkiye tarafından ananeviy qol tutuv olacağına umüt etemiz», – dep bildire.
Onan ğayrı, telefon qonuşması esnasında taraflar, şu cümleden Ukraina ile Türkiye arasında Yüksek seviye strategik şurasınıñ Yedinci toplaşuvını keçirmek maqsadınen bundan soñki yüksek seviyede temasları grafigini keliştirdiler.
Ukraina, BMT baş sekretari Antoniu Guterriş, Telükesizlik şurasınıñ başlığı Karel van Osterom ve bütün aza devletler eyetlerine, Rusiye tarafından ilhaq etilgen Qırımda prezident saylavınıñ ötkerilmesi BMT Nizamnamesini boza, deye resmiy mektüpler yolladı.
Ukraina diplomatları, qanunsız rey berüvniñ ötkerilmesi taqdirde yarımadadaki Rusiye ukümet organlarınıñ vekillerine qarşı qoşumça sanktsiyalarnı tatbiq etmege davet eteler.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde ilhaq etilgen Qırımda Rusiye prezidenti saylavınıñ tanılmaması aqqında denile.
