Link açıqlığı

Saatnıñ esas haberi

Kyivde Rusiye ilhaqınıñ neticeleri ve Qırımnıñ azat etilüvi perspektivalarını muzakere ettiler


Vernadskiy adına Tavriya milliy universiteti binasında tögerek masa. 2018 senesi mart 16 künü

2018 senesi mart 16-da Kyivde Vernadskiy adına Tavriya milliy universiteti binasında tögerek masa ötkerildi. Onda Rusiye ilhaqınıñ neticeleri ve Qırımnıñ azat etilüvi perspektivalarını muzakere etildi. Bunı Qırım.Aqiqat muhbiri bildire.

Vernadskiy adına Tavriya milliy universitetiniñ rektorı Vladimir Kazarin açılış söz ile çıqış yaptı: «Menim fikrimce, mart 16, 17 ve 18 künleri bu adiselerni (Qırımnıñ ilhaqını – QA) aqılğa ketirmek ve «Biz er şeyni yaptıqmı?» sualini soramaq mecbur eteler. Bu sene endi dörtünci yıllıqtır. Bu, çoq şey añlamaq ve bu problemanıñ içki añlayışını işlep çıqmaq içün yeterli muddettir».

Tedbir esnasında Ukraina ukümeti ve qırımtatarlarnıñ vekilleri, mutehassıslar, faaliyetçiler ve aq-uquq qorçalayıcıları ilhaqnıñ sebepleri ve «yarımadanıñ azat etilmesi içün ne yapılğanına» dair öz fikirlerini ifade ettiler.

Ukraina prezidentiniñ Qırımdaki daimiy temsilcisi Boris Babin, Qırımtatar Milliy Meclisi reisiniñ muavini Ahtem Çiygoz, Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirniñ birinci muavini Yusuf Kurkçi, Qırımtatar halqınıñ aqlarını qorçalav komitetiniñ reisi Eskender Bariyev, Ukrainadaki İnsan aqları boyunca Helsinki ittifaqınıñ adliyecileri Anna Rassamahina ve Maksim Timoçko ve başqalar öz maruzaları ile çıqışta bulundı.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG