Avropa Şurası Parlament Assambleyası (PACE) Bürosı, Assambleyanıñ «Qırımda Rusiye tarafından qırımtatarlarğa qarşı ırqiy diskriminatsiya» mevzulı ayrı bir maruza ve rezolütsiyanı azırlaycağına dair qarar aldı. Bunı, bunıñ arfesinde Ukraina Yuqarı Radasınıñ AŞPAdaki daimiy eyetiniñ başlığı, Assambleyanıñ vitse-prezidenti Vladimir Aryev özüniñ Facebookında yazdı.
O, mart 13-te AŞPA monitoring komitetiniñ bu rezolütsiyanı azırlamaq kerekligi içün rey bergenini hatırlattı.
Ondan ğayrı, onıñ aytqanına köre, AŞPAnıñ apreldeki sessiyasında «Noviçok» ile ucüm ve Qırımda qanunsız saylav boyunca ayrı munaqaşalar ola bilir».
Mart 13-te AŞPAnıñ monitoring komitetiniñ oturışuvında Aryev ve ondan ğayrı Qırımtatar Milliy Meclisi reisiniñ muavini Ahtem Çiygoz ve Vatandaşlarnıñ urriyetleri merkezi leyhalarınıñ rehberi Aleksandra Romantseva, ilhaq etilgen Qırımda qırımtatarlarğa qarşı repressiyalarnıñ arttırılması aqqında ikâye ettiler.
Aryevniñ aytqanına köre, o vaqıt monitoring komiteti qırımtatarlarnıñ vaziyeti boyunca mahsus maruza ve rezolütsiyanıñ azırlanmasına bir ağızdan qol tutuv boyunca qarar berdiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
