Mart 14, çarşenbe künü, ilhaq etilgen Qırım ile memuriy sıñırdaki «Çaplinka» kiriş-çıqış noqtasında Ukraina vatandaşı Ukraina sıñırcısına qabar berecek oldı. Bunı Ukraina Devlet sıñır hizmetiniñ matbuat hizmeti Facebookta bildire.
Olarnıñ malümatına köre, memuriy sıñırğa cayav pasportı keçersiz olğan Ukraina vatandaşı keldi. Vatandaş, maniasız keçmek içün sıñırcılarğa 1000 hrivna teklif etti.
Arbiy hadimler uquqsız ucretni qabul etmedi ve Milliy polis hadimlerine, Ukraina Cinaiy kodeksiniñ «Vazifeli şahısqa uquqsız kârnıñ teklif etilmesi, vade etilmesi ya da berilmesi» şeklindeki 369-ncı maddesi ile közde tutulğan cinaiy uquq bozuluvınıñ alâmetini tayin etkenleri aqqında bildirdiler.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
