Almaniyanıñ yañı tış işleri naziri Hayko Maas Qırımnıñ ilhaqını ve Rusiyeniñ Ukrainağa qarşı devam etken tecavuzını taqbih etti.
Reuters agentligi, Maasnıñ Almaniya TİN başlığı vazifesindeki birinci nutqunı naqil etip: «Rusiye tarafından Qırımnıñ aqsız ilhaqı ve Ukrainağa qarşı devam etken tecavuzğa narazılıq köstermege devam etemiz», – dep bildire.
Maas, Rusiyeniñ Ukrainadaki areketlerini tenqid etip, Moskva ile munasebetlerni dialog vastasınen eyiliştirmege kene de umüt etkenini söyledi.
Ondan ğayrı o, Almaniyanıñ tış siyaseti, Rusiye özüni ğarp devletleriniñ antogonisti olaraq tayin etken vaziyetke köre alıp barılmaq keregine dair fikrini ifade etti.
Mart 14-te Almaniya Bundestagınıñ deputatları Hristian-demokratik ittifaq (HDİ) fırqasınıñ lideri Angela Merkelni Almaniya kantsleri vazifesine sayladılar. Böylelikle, o, ardı-sıra dörtünci kere kantsler vazifesinde buluncaq.
2017 senesiniñ sentâbrinde Merkelniñ konservativ bloku Almaniyadaki saylavda şeklen ğalebe qazandı, faqat fırqası içün neticeler, bundan dört yıl evelkilerine köre, daa beter edi. Merkel yarım yıldan ziyade koalitsiya aqqında muzakereler yaptı. Başta – Azat demokratik fırqasınıñ liberalları ile. Lâkin olar, Merkel ile koalitsion ukümet içün «umumiy ğaye tapıp olamağanlarına» sıltap, olarnı toqtattılar.
Bundan soñ Merkel, başlığı Martin Şults olğan Almaniyanıñ Sotsial-demokratik fırqasına qol tutuv sorap muracaat etti. Yanvar ayında olarnen yañı kabinet aqqında añlaşma yapıldı.
