Mart 14-te Vaşingtonda AQŞta birinci kere Ukrainanıñ qırımtatar rejissörı Ahtem Seitablayevniñ «Kiborgi» filmi kösterildi. Bu hususta AQŞtaki Ukraina elçiliginiñ bildirüvinde aytıla.
Elçilikte: «Film Qoşma Ştatları Kongressinde «Rusiyeniñ Ukrainağa qarşı hibrid cenki. Global telükege global cevap» munaqaşası çerçivesinde kösterilgen edi», – dep bildirdiler.
Diplomatlarnıñ bildirgenine köre, filmni taqdim etmek içün AQŞqa cümleden filmniñ rejissörı Ahtem Seitablayev, prodüser İoanna Dâdüra, Ukraina qaramanı, militanlarnıñ sabıq esiri Vladimir Jemçugov keldiler.
Elçilikniñ bildirüvinde, AQŞtaki Ukraina elçisi Valeriy Çalıynıñ sözleri menba kösterilip: «Rusiye tarafından başlatılğan hibrid cenk şimdi ketken sayın daa ziyade global harakter ala, Rusiyeniñ Ukrainağa qarşı tecavuzı ise demokratik degerlikler ve halqara nizamğa qarşı ciddiy bir meydan oquması oldı», – denile.
2017 senesi dekabr 7-de rejissör Ahtem Seitablayevniñ Donetsk ava limanınıñ imayecileri aqqında «Kiborgi» filminiñ kösterilüvi başlandı. Film bediiydir, lâkin o, aqiqiy adiseler esasında çıqarıldı. Film çekimleri Kyivde ve Çernigov vilâyetinde yapıldı. Filmniñ umumiy büdjeti aman-aman 48 million ruble.
«Kiborgi» filmi, ülkede kösterilüvi esnasında toplağan para miqdarı boyunca Ukraina filmleri arasında rekord qırdı.
