Kremlniñ kontroli altında olğan Aqmescitteki Kyiv rayonı mahkemesi «narazılıq çayırı» faaliyetçisi Fazil İbraimovnıñ azatlıqnı sıñırlav tedbirine berilgen apellâtsiyasını red etti. Bunı mart 14-te mahkeme oturışuvından soñ yaqalanğannıñ advokatı Edem Semedlâyev özüniñ videomuracaatında bildirdi.
Fevral 15-te Rusiye İçki işler nazirliginiñ (İİN) Qırım boyunca idaresiniñ hadimleri Aqmescitte Strelkovaya soqağı rayonında «topraq arsasını öz başına zapt etüvni teşkil etkenlerden biri»niñ evi ve arsasını tinttiler.
Polis, «narazılıq çayırı» faaliyetçisi Fazil İbraimovnı yaqalap, Rusiye İİNniñ Qırım boyunca idaresiniñ şeer bölügine ketirdi.
Qırım kütleviy haber vastaları, İbraimovnıñ «Rusiye Cinaiy-protsessual kodeksiniñ 91-nci maddesi boyunca cinayet işlemesi şübhesi ile» resmen yaqalanğanını bildirdiler.
Fazil İbraimov «narazılıq çayırları» – qırımtatarlar sürgünlikten qaytqan soñ olar tarafından zapt etilgen topraqlarnıñ qanuniyleştirilmesi içün küreşi ile belli.
Qırımtatarlar evler qurğan «Strelkovaya» «narazılıq çayırı» yerinde «Krımskaya roza» adlı yañı 9 biñ kişilik rayonnı qurmağa azırlanalar. Mesken evlerden ğayrı mektepler, balalar bağçaları, sport kompleksleri ve tükânlarnı qurmaqnı planlaştıralar. Şimdi adna ekseriyetle sürgünlikten qaytqanlar yaşay.
