Ukraina Baş prokurorı Yuriy Lutsenko, Ukrainanıñ qıtadaki bir qaç vilâyetinde «Rusiyede ve onıñ tarafından işğal etilgen territoriyalardaki Ukrainağa qarşı merkezler»ge alâqadar olğan şahıslarda 28 tintüvniñ yapılğanını bildirdi.
Onıñ mart 14-te Facebooktaki saifesinde bildirgenine köre, tintüvler QMC prokuraturası ve SBU hadimleri tarafından yapıldı.
Lutsenko: «Lviv vilâyetinde, halqara konferentsiyada Qırımnıñ Rusiye tarafından işğaline qol tutuv ile maruza azırlanğan yazılar tutıp alındı», – yazdı.
Ondan ğayrı, prokurornıñ malümatına köre, Herson vilâyetinde «içinde 25 biñ dollar ücreti qarşılığına yerli şuralar tarafından prezidentniñ impiçmenti aqqında qararnıñ alınmasını teşkil etmek vazifesi olğan Ukrainağa qarşı merkeznen yazışmanı taptılar». Harkiv vilâyetinde köpürler ve keçitlerniñ haritaları, patronlar, granatalar, elektrotutaştırıcı ile plastid ve 50 biñ dollar, Rusiye bankınıñ kartaları tutıp alındı, dep qayd etti Lutsenko.
Bunıñ arfesinde QMC prıkuraturası, tintüvler vaqtında «Ukrainağa qarşı mezkür faaliyetlerniñ azırlanmasına işaret eteken Qırım ilhaqına qol tutuv boyunca teşviqat materialları, para, irişilmesi sıñırlı olğan malümat ile vesiqalar, yasaq etilgen mahsulat ve şu cümleden granatalar ve patronlar tapılıp musadere etildi», dep bildirdi.
Qırım.Aqiqat olıp keçkenniñ tafsilâtlarını tayin ete.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
