Ukraina Tış işleri naziri Pavlo Klimkin Rusiye prezidenti vazifesine namzet olğan Kseniya Sobçaknıñ ilhaq etilgen Qırımda tekrar referendum keçirmek teklifini, telükeli dedi. Nazir bu fikirni Kyivde mart 13-te, Qırımtatar Milliy Meclisi liderleriniñ yılda bir kere ötkerilgen çetel diplomatları ile körüşüvinde seslendirdi.
Klimkin: «2014 senesinde o (Kseniya Sobçak – QA), işğalni «parlaq surette keçirilgen operatsiya» dedi. Bugün ise o, halqara uquqnıñ bozuluvı vaqiasını tanıp, onı tüzetmege davet etmey de, yalıñız işğal etilgen Qırımnıñ territoriyasında nasıldır mifik referendumnı keçirmege teklif ete. Tariflenmesine köre, bu referendumnıñ doğrulığına kim inanır? Sobçak tarafından yapılğan böyle teklifler telükelidir. Eger bu, onıñ şahsiy yanaşuvı olsa, suhbeteşirmiz. Lâkin Qırımnıñ Rusiye tarafından işğalini qanuniyleştirgen bunıñ kibi canbazlıqlarğa biz qanmaycaqmız. Er angi referendum keçirilecek olsa, Ukrainanıñ bütün territoriyasında keçirilmeli», – dep qayd etti.
В Kyivde mart 13-te Qırımtatar Milliy Meclisi liderleriniñ çetel devletleriniñ elçileri ile yılda bir kere ötkerilgen ananeviy körüşüvi başlandı. Onda Meclisniñ liderleri Qırımnıñ deokkupatsiyası ve ondan soñ yarımadanıñ qırımtatar muhtariyeti sıfatında reintegratsiya meselelerini muzakere ettiler.
Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
