Mart 12-de Avropa Birligi Şurası, AB tarafından Ukrainanıñ topraq bütünligi, suvereniteti ve mustaqilligine tecavuz ve ziyan etüv ile alâqalı olğanlarğa qarşı sanktsiyalarını daa yarım yılğa uzattı.
Azatlıq Radiosı muhbiriniñ bildirgenine köre, 150 kişi ve 38 teşkilâtqa qarşı sanktsiyalar 2018 senesi sentâbr 15-ke qadar cariy olacaqlar.
AB Şurasınıñ bildirüvinde añlatılğanına köre, «vaziyetniñ talili esasında çıqarılğan hulâsa, sanktsiyalar rejimini deñiştermege acet olmağanını köstere. Munasip malümat ile bu şahıslar ve teşkilâtlarnıñ sanktsiyalar altında olğanlar cedveline kirsetilmesiniñ sebepleri icap etkende yañartıla edi».
Şimdiki qarar ABniñ Resmiy jurnalında 2018 senesi mart 13-te derc etilecek.
AB, Ukrainanıñ suvereninteti içün doğurğan telüke sebebi ile Rusiyege qarşı sanktsiyalarnı soñki kere 2017 senesi sentâbr 14-te – 2018 senesi mart 15-ke qadar uzattı.
Sıñırlav tedbirlerine viza sıñırlamaları ile esaplarnıñ buzlatılması kireler. Şuranıñ saytında, Ukrainadaki vaziyetniñ talili «sanktsiyalar rejimine deñişmelerni köstermedi», dep qayd etildi. O vaqıt Brüssel sanktsiyalar cedvelinden öldürilgen dört separatistni çıqardı.
Sıñırlav tedbirleri 2014 senesiniñ martında, Avropa Birligi tarafından Rusiyeniñ Ukrainağa qarşı tecavuzına cevap olaraq tatbiq etilgen edi.
AB buña cevap olaraq bir sıra diger sanktsiyanı da tatbiq etti ve şu cümleden: 2018 senesi iyül 31-ge qadar devam etecek Rusiye iqtisadiyatınıñ ayrı saalarına qarşı iqtisadiy sanktsiyalar; Rusiye tarafından yarımadanıñ qanunsız ilhaqına cevaben Qırım ve Aqyar territoriyasında cariy olğan sıñırlav tedbirleri. Olar 2018 senesi yünniñ 23-ne qadar devam etecekler.
Ondan ğayre buña oşağan sanktsiyalarnı AQŞ ve «Yediniñ gruppası»nıñ diger devletleri ve bazı başqa devletler tatbiq etti.
