Aqmescitte mart 11-de Qırım alimi, fizika-matematika ilimleri doktorı, cemiyet ve siyaset erbabı Lenur Arifov vefat etti.
Bunı özüniñ Facebooktaki saifesinde Crimean Tatars internet-portalı bildire.
Bildirüvde: «1990-ncı yıllarda Lenur bey Qırımtatar halqınıñ qurultayına delegat ve Qırım MC Yuqarı Radasına deputat olaraq saylanğan edi. Ondan soñ biraz vaqıt Qırım ükümeti reisiniñ muavini vazifesinde çalıştı. Soñki yıllarda Lenur Arifov özüni tolusınen ilimge ve ocalıq işine bergen edi», – denile.
Arifov 1938 senesi dekabr 10-da Yaltada doğdı. 1961 senesinde A. Navoi adına Samarqand devlet universitetini bitirdi. Fizika-matematika ilimleri doktorı, professor edi. Uzbekistan SSC İlimler akademiyası Nükleer fizika institutında, Aqmescit devlet universitetinde, Qırım MC Yuqarı Radasında, Qırım ukümetinde çalıştı. Oña QMCde nam qazanğan tasil hadimi unvanı berilgen edi.
