Link açıqlığı

Saatnıñ esas haberi

Qırımdaki qazaq teşkilâtları Rusiye prezidenti saylavında şimdiki Rusiye prezidenti Vladimir Putinge qol tutmağa davet ettiler. Bunı özüniñ Facebooktaki saifesinde Qırımda saylanğan Rusiye Devlet Dumasınıñ deputatı Andrey Kozenko bildirdi.

Kozenkonıñ yazğanına köre, qazaqlar «qazaq halqınıñ birinci umum Qırım toplaşuvı»nda Putinge qol tutmağa davet ettiler.

Kozenko: «Toplaşuvnıñ iştirakçileri bir ağızdan ülkemizniñ kelecekteki prezident saylavında Rusiye baş komandanı Vladimir Vladimiroviç Putinge qol tutmağa davet ettiler. Qazaq qardaşlarım, sizge qorçalayıcı melek olsun! Lübo!», – dep yazdı.

Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG