Link açıqlığı

Saatnıñ esas haberi

Amerikanıñ pilotsız uçağı Qırım yalısı boyunca keşif etti


AQŞnıñ RQ-4A Global Hawk pilotsız uçağı bir qaç saat devamında Qırımnıñ yalısı boyunca uçuş yaptı.

Bunı aviatsiyanıñ areketlerini közetken CivMilA resursı Twitterde bildire.

Bildirüvde: «Pilotsız uçaq 53 000 fut yüksekliginde şarqiy Ukraina, Qırım ve sail çizgisi boyunca keşfiyattan soñ Yunanistanğa yol almaqta», – denile.

Plane-Radar Twitter-esabında bildirilgenine köre, pilotsız uçaq Sigonella (Sistiliya) aviabazasından avalandı ve ondan soñ bir qaç saat 16 biñ metr yüksekliginde ilhaq etilgen yarımadanıñ ğarbiy ve cenübiy yalısı boyunca uçtı.

Qırım yalılılarınıñ keşif etmesinden evel pilotsız uçaq Donbassta ayırma sıñır çizgisi boyunca uçtı.

Bu yılnıñ yanvarinde eki Amerika uçağı – deñiz keşfiyatçısı P-8A Poseidon ve uzaq mendilli pilotsız uçaq RQ-4A Global Hawk Qırım territoriyasını da qaplap alğan keşfiyat operatsiyasını keçirdiler.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG