Mart 8-de OSCEniñ Daimiy şurasında Avropada havfsızlıq ve emekdaşlıq boyunca teşkilât yanında AQŞnıñ işleri boyunca muvaqqat vekil Harri Kamian, Rusiye Qırımnı arbiyleştirdi ve Qara deñizde arbiy forpostını meydanğa ketirdi, dep bildirdi.
O, Qoşma Ştatlarnıñ daa bir kere Rusiyeni ilhaq etilgen Qırımda repressiyalar kampaniyasını toqtatmağa ve Qırım üzerindeki kontrolni Ukrainağa qaytarmağa davet etkenini qayd etti.
Kamian: «Biz dünyada tanılğan sıñırlar çerçivesinde Ukrainanıñ akimiyeti, mustaqilligi ve topraq bütünligine qatiyen qol tutamız. Rusiye yarımada üzerindeki kontrolni Ukrainağa qaytarmağance Rusiyege qarşı Qırım sanktsiyalarınıñ qullanılması devam etecek», – dep bildirdi.
O, Rusiye tarafından Qırımnıñ ilhaqından dört yıl keçkenini ve yarımadada faaliyetçilerniñ öldürilmesi ve ğayıp olmasınıñ Rusiye tarafından ale daa tahqiq etilmegenini hatırlattı.
Bildirüvde: «Bu afta Rusiyeniñ işğaline qarşı narazılıq köstergeninden soñ yaqalanğan qırımtatar Reşat Ametovnıñ alıp qaçılğanına dört yıl tola. Eki aftadan soñ onıñ cesedi deşetli eziyetlevler izlerinen tapılğan edi… Kimse mesuliyetke çekilmedi… Ondan ğayrı, Ukraina bayrağını köstergen soñ yaqalanğanlarını bildirmek içün aqrabalarını çağırğan ve ondan soñ iç bir haberleri olmağan ukrain faaliyetçileri İvan Bondarets ve Valeriy Vaşçuknıñ ğayıp olğanına da dört yıl toldı. Biz Rusiyeni, qabaatlı olğanlarnı mesuliyetke çekmege davet etemiz», – denile.
Kamian yapqan çıqışnıñ tolu metni OSCEde AQŞ Missiyasınıñ saytında derc etildi.
Valeriy Vaşçuk ve İvan Bondarets Qırımğa 2014 senesinde Rovno vilâyetinden keldiler. Olar ale daa tapılmadı.
Reşat Ametovnı 2014 senesi mart 3-te, Qırım ukümeti binasına «referendum»ğa qarşı bir kişilik mitingge çıqqanda alıp qaçtılar. Mart 15-te üstünde eziyetlevlerniñ izleri olğan Ametovnıñ cesedini Qırımnıñ Qarasuvbazar rayonındaki ormanda taptılar. Qırımdaki Rusiye ukümeti Reşat Ametovnıñ qatilini tapqanına para mukâfatını vade etti. Lâkin qatiller öyle de tapılmadı.
