Qırımnıñ Rusiye parlamenti yanındaki mal-mülk ve topraq munasebetleri boyunca komitetinde keçken muşaverede Qırımnıñ bazı rayonlarında şahsiy mesken qurucılığı içün boş yer amelde qalmadı, dep bildirdiler.
Muessiseniñ malümatına köre, aynı zamanda yarımadada «nevbette turğanlar» tarafından arsalarnıñ ayırılması içün arizalar berilmegen bölgeler bar.
Al-azırda Qırımnıñ 66 nomeralı «Devlet ya da belediyege ait topraq arsalarınıñ ayırılması ve topraq munasebetleriniñ bazı meseleleri aqqında» qanunına deñişmelerniñ kirsetilmesini közde tutqan qanun leyhası işlep çıqıla. Deñişmelerniñ maqsadı – vatandaşlarnıñ imtiyazları olğan kategoriyalarına topraqnı bedava aluv aqqını temin etmektir. Bunı Qırım Goskomregistriniñ (Devlet tarafından qayd etüv ve kadastr boyunca devlet komitetiniñ) matbuat hizmetinde qayd ettiler.
Bildirüvde: «Muşavere iştirakçileri şu noqtada bir fikirge keldi: vatandaş bir belediyede imtiyazlı topraq aluv nevbetinde turıp da, anda topraq olmasa, belediyeler arasında añlaşma olğanda, qomşu şeer ya da qasabasınıñ topraq fondundan arsanı ayıruv mehanizmlerini qıdırmaq kerek», – denile.
2016 senesinde Kremlniñ kontroli altında olğan Mal-mülk ve topraq munasebetleri nazirliginde, 10 biñden ziyade imtiyazlı vatandaşlarnıñ topraq arsalarını bedava ala bileceklerini iddia ete ediler.
