Qabartı-Malqar Respublikasında (Rusiyeniñ şimaliy Kavkaz bölgesinde – QA) 74 yıl evel mart 8-de Stalin rejimi tarafından Orta Asiyağa sürgün etilüvniñ qurbanlarını hatırlaylar. Bunı Azatlıq Radiosı bildire.
Bölgeniñ camlerinde Qazaqstan ve Qırğızstanğa sürgün etilüvniñ neticesinde ölgenler içün dualar oquylar.
Qabartı-Malqar Respublikasınıñ reisi Yuriy Kokov sürgün etilüvnge «cinaiy akimiyet rejiminiñ deşetli cinayeti» dedi. Onıñ aytqanına köre, Kabardino-Balkariyanıñ bütün sakinleri «siyasiy repressiyalarnıñ qurbanlarını hatırlay ve ğayıplarnıñ acısına duyğudaşlıq eteler».
Umumen 38 000 balqar sürgün etildi. Olarnıñ yarısından ziyadesi qadınlar ve balalar edi. Stalin rejimi balqar halqını natsist Almaniyasınen emekdaşliq etkeninde qabaatladı.
Sürgünlikni başından keçirgenler Şimaliy Kavkazğa 1957 seneside, SSCB Yuqarı Şurası sovet Rusiyesiniñ sıñırları içinde Qabartı-Malqar Respublikasını ğayrıdan meydanğa ketirgen soñ qaytıp oldılar.
Balqarlar – türk tilinde qonuşqan ve ekseriyetle musulman dinini kütken, sayısı qararnen 110 000 kişi olğan halqtır.
