2017 senesinde ilhaq etilgen Qırımda köy iqtisadiyatı mahsulatınıñ istisalı 5,7%-ge eksildi. Bunı Kremlniñ kontroli altında olğan Krımstatnıñ (Federal devlet statistikası hizmetiniñ Qırım ve Aqyar şeeri boyunca idaresiniñ) matbuat hizmeti bldire.
Matbuat hizmeti: «Köy iqtisadiyatı mahsulatınıñ istisalı 5,7%-ge eksildi. Ösümlik asravcılığında – 7,9%-ge ve ayvan asravcılığında – 1,8%-ge eksilüv bar. 2017 senesinde köy iqtisadiyatı mahsulatı istisalınıñ umumiy kölemi 57,5 milliard ruble (qararnen 26,4 milliard ruble – QA) teşkil etti», – dep Rusiye muessisesi başlığınıñ sözlerini naqil ete.
Krımstatnıñ malümatına köre, 2017 senesinde 1,394 bürtükli aşlıqlar ve burçaqlı ösümlikler toplandı.
Bildirüvde: «İri baş ayvanlarnıñ sayısı 0,1%-ge arttı. Quş sayısı 21,8%-ge arttı. Domuzlarnıñ sayısı ise 8,5%-ge eksildi», – denile.
Kremlniñ kontroli altında olğan Qırımnıñ Köy iqtisadiyatı nazirligi, 2018 senesinde köy iqtisadiyatınıñ inkişafına 3 milliarddan ziyade ruble (qararnen 1,4 milliard hrivna – QA) alğanını ilân etti.
Nazirlikte bürtükli aşlıqlarnıñ toplanmasını amelde 50 biñ tonnağa arttırmaqnı planlaştıra ediler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
