AQŞnıñ Ukraina meseleleri boyunca mahsus temsilcisi Kurt Volker, «Qırım içün sanktsiyalarnıñ arttırılması aqqında vaqıt keldi», dep bildirdi.
Martnıñ 7-sinde «Ukrinform»nıñ bildirgenine köre, bunı Volker, The German Marshall Fondınıñ Varşavadaki şubesine çıqış yapqanda söyledi.
«Ukrinform»: «AQŞ, AB ve Ukrainanıñ Rusiye tarafından Qırımnıñ ilhaqını tanımağanları muim. Menim fikrimce, munasebetimizni ve şu cümleden (siyasetçiler tarafından yapılğan – QA) ziyaretler, bu territoriya ile ticaret ve biznes-temaslar içün neticelerni nasıl etip sertleştire bilecegimizni tüşünmege vaqıt keldi», – dep, Volkerniñ sözlerini naqil ete.
O, Qırım problemaları «işğal etilgen Donbass ile aynıdır», dep qayd etti, yaza KHV. Volkerniñ fikrine köre, tek bir farqı bar, o da, Qırım ile qıtadaki Ukraina arasındaki memuriy sıñırda sürekli arbiy areketlerniñ olmamasıdır.
Aynı zamanda Volkerniñ içtimaiy ağlarında bu beyanat tasdiqlanmadı. AQŞnıñ mahsus temsilcisi özüniñ Twitterinde qısqadan: «Bölgede Rusiyeniñ tecavuzına nasıl etip qarşılıq köstermek ve Ukrainanıñ topraq bütünligine qol tutmaq kerek olğanını muzakere etmek içün Poloniya prezidenti Kabinetiniñ rehberi Kşiştof Şçerskiy ile körüştim», – yazdı.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
