Link açıqlığı

Saatnıñ esas haberi

Qırım muftisiniñ muavini Ayder İsmailov Yaltadaki «Hizb ut-Tahrir işi» boyunca oturışuvğa kelmedi


Rusiyede Rostov-na-Donu şeerindeki Şimaliy Kavkaz okrugınıñ arbiy mahkemesinde Yaltadaki «Hizb ut-Tahrir işi» boyunca oturışuv keçti. Kremlniñ kontroli altında olğan Qırım ve Aqyar musulmanlarınıñ diniy idaresi muftisiniñ muavini Ayder İsmailov oña kelmedi.

Bunı, «Qırım birdemligi» birleşmesiniñ Facebooktaki saifesinde derc etilgen videoda advokat Emil Kurbedinov bildirdi.

Aynı zamanda İsmailovnıñ ne sebepten kelmegenine dair malümat berilmey.

Emir-Usein Kuku işi figurantınıñ advokatı Sergey Losevniñ bildirgenine köre, mahkeme, qorçalayıcı sıfatında Emir-Usein Kukunıñ ömür arqadaşı Meryem Kukunıñ celp etilmesine dair muracaatnı red etti. Advokatlar onı, musulman adetleriniñ añlatılması içün celp etmek istey ediler.

Nevbetteki oturışuv martnıñ 28-ne planlaştırıldı.

2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandı. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqadar olğanlarında qabaatlaylar.

Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken seyyar oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.

Yanvarniñ 24-nde Ukraina Tış işleri nazirligi Rusiyeden Yaltadaki «Hizb ut-Tahrir işi»niñ altı figurantınıñ azat etilmesini talap etti.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG