Martnıñ 5-nde Kremlniñ kontroli altında olğan Bağçasaray mahkemesinde polis hadimine aqaret etkeninde qabaatlanğan Şevket Razzakovnıñ işi boyunca oturışuvnı başqa künge avuştırdılar. Bu hususta Qırım.Aqiqat içün beren izaatta Razzakovnıñ advokatı Mammet Mambetov bildirdi.
Advokat, mahkemege «kene şaatlar kelmedi», dep iddia ete. O, oturışuvnıñ mart 15 künü saat 14.00-ke avuştırılğanını bildirdi.
Bu yılnıñ fevralinde Bağçasaray mahkemesi aynı bunıñ kibi, şaatlar kelmegenler içün, Şevket Razzakovnıñ işi boyunca oturışuvnı başqa künge avuştırdı.
12017 senesi aprelniñ 13-nde Rusiye telükesizlik hadimleri Bağçasarayda Seydamet Mustafayevniñ evini tinttiler. Qırımtatar faaliyetçileri ve olarnıñ arasında Razzakov polisniñ areketlerini közetmek içün toplaştılar. Polisler ve OMON hadimleri, küç qullanıp, toplaşqanlarnı dağıtacaq oldılar. Neticede yedi kişi yaqalandı. Razzakov ise polis hadimine «tükürüv şeklinde yapılğan» aqaret etkeninde qabaatlandı.
Qırımnıñ Rusiye tarafından ilhaqından soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq kütleviy surette tintile.
