Rusiyeniñ kontroli altında olğan Aqmescitteki Kyiv rayonı mahkemesi Bağçasaraydaki «Hizb ut-Tahrir işi» figurantları Seyran Saliyev, Memet Belâlov ve Asan Suleymanovğa tevqif muddetini iyünniñ 9-na qadar uzattı. Bunı martnıñ 5-nde Qırım.Aqiqat içün bergen izaatta «Qırım birdemligi» faaliyetçisi Server Mustafayev bildirdi.
Faaliyetçiniñ aytqanına köre, qorçalav tarafı «adet üzre» azatlıqnı sıñırlav tedbiriniñ deñiştirilmesini istedi, lâkin Rusiye mahkemesi bu ricanı köz ögüne almadı.
Dekabrniñ 21-nde Kremlniñ kontroli altında olğan Qırımnıñ Yuqarı mahkemesi imaye tarafından üç «Hizb ut-Tahrir işi» figurantı – Seyran Saliyev, Memet Belâlov ve Timur İbragimovğa tevqifniñ uzatılmasına qarşı berilgen apellâtsion şikâyetini red etti.
Oktâbrniñ 12-sinde Qırımda Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tevqif ettiler. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, taqip etilüvlerniñ diniy alâmetine köre yapılğanını tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleri olğanını qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
