Link açıqlığı

Saatnıñ esas haberi

Qırımtatar Milliy Meclisi reisiniñ muavinleri İlmi Umerov ve Ahtem Çiygoz Litvanıñ paytahtına keldiler. Anda olar martnıñ 4-5 künleri arasında bir sıra körüşüvler yapıp, şu cümleden bu devletniñ prezidenti Dalâ Gribauskayte ile körüşecekler.

Bunı Facebookta Qırımtatar Milliy Meclisiniñ reisi Refat Çubarov bildirdi.

Çubarov: «2018 senesi martnıñ 4-5 künlerinde Qırımtatar Milliy Meclisi reisiniñ muavinleri İlmi Umerov ve Ahtem Çiygoz Vilnüste bulunacaqlar. Ziyaretniñ programmasında Litva prezidenti, Seym spikeri ve Seym deputatlarınen körüşüvler bar», – yazdı.

O, Umerov ve Çiygoznıñ Litvağa ziyaret etkenleriniñ esas missiyası – «yetekçi dünya siyasetçilerini Ukraina, Qırım ve qırımtatarlar etrafında birleştirmektir», dep qayd etti.

2017 senesiniñ sentâbrinde Kremlniñ kontroli altında bulunğan Qırım Yuqarı mahkemesi Ahtem Çiygozğa 8 yıl koloniya cezasını tayin etti. O, 2014 senesi fevral 26-sında Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen ötkerilgen mitingde iştirak etkeni içün 2015 senesiniñ yanvarinde yaqalanğan edi. Çiygoz kütleviy qarışıqlıqlarnı teşkil etkeninde qabaatlandı.

Daa soñra Qırımda mahkeme İlmi Umerovğa eki yıl koloniya-qasaba cezasını tayin etti. O, açıq surette separatizmge davet etkeninde qabaatlandı.

Oktâbrniñ 25-nde Rusiye akimiyeti Umerov ile Çiygoznı azat etip, Türkiyege teslim etti. Ondan soñ Qırımtatar Meclisiniñ azat etlgen liderleri Kyivge keldi.

XS
SM
MD
LG