Teatr ve kino aktrisası Liya Ahecakova, Rusiyede «terrorizm» içün mahküm etilgen rejissör Oleg Sentsovnı, «siyasiy ayın-oyunlar» içün qullanıla bilecek rein saya. Bunı aktrisa «Qırım.Aqiqat TV» içün bergen intervyüde söyledi.
Ahecakova: «Maña köre, o, nasıldır rein… men bilmeyim, bu siyaset, ya da nasıldır ayın-oyunlar. Ukrainağa qarşı yapılğanlar, men buña ne deycegimi de bilmeyim. O, bizim bugünki bütün milliy ğayemizniñ reinidir. Ve bu, umumen, abayladıñızmı – qaşqır avı yapıla, medeniyet erbaplarınıñ avı? Ve şahıs ne derecede büyük olsa, onı bastırmaq, aşalamaq, mahv etmek de o derecede daa elverişlidir», – dedi.
Oleg Sentsovnıñ talihi aqqında daa tafsilâtlı surette «Qırım.Aqiqat TV» yayınından bilmek mumkün.
2014 senesiniñ mayısında Qırımda Rusiye mahsus hizmetleriniñ vekilleri Ukraina rejissörı Oleg Sentsovnı, yarımadada terroristik aktlarını teşkil etkeninde qabaatlap, yaqaladılar. 2015 senesiniñ ağustosında Rusiyedeki Şimaliy Kavkaz okrugınıñ Rostov-na-Donu şeerinde bulunğan arbiy mahkemesi Sentsovğa, Qırım territoriyasında terroristik faaliyetinde qabaatlav boyunca 20 yıl sert rejimli koloniya cezasını berdi. O, qabaatını inkâr ete.
«Memorial» aq-uquq qorçalayıcıları merkezi Sentsovnı siyasiy mabüsler cedveline kirsetti.
Al-azırda Sentsov qomşu Rusiyedeki Yamalo-Nenetsk muhtar okrugınıñ Labıtnangi şeeri koloniyasında buluna.
