AQŞ Mudafaa nazirliginde, Rusiye prezidenti Vladimir Putinniñ yañı nükleer silâ aqqında beyanatına taaciplenmegenlerini bildirdiler. Pentagonnıñ matbuat kâtibesi Dana Uaytnıñ bildirgenine köre, AQŞ arbiyleri öz ülkeni mudafaa etmege azırlar.
Uayt: «Beyanat bizni taaciplendirmedi ve Amerika halqı, bizim tam olaraq azır olğanımızdan emin olmaq kerek», – dedi. Bunı Azatlıq Radiosı bildire.
O, Avropada AQŞnıñ raketalarğa qarşı mudafaa (RQM) sistemaları Rusiyege qarşı yerleştirilmeyip, İran ve Şimaliy Koreyadan kelgen telükelerge qarşı yerleştirildi, dep ilâve etti.
Martnıñ 1-nde Rusiye prezidenti Vladimir Putin, Federal toplaşuvğa doğrultılğan muracaatında, Rusiyede qanatlı raketalar içün, RQM sistemaları tarafından zararlanmaz, üstün quvetke malik olğan kompakt bir nükleer energetik tertibatnıñ işlep çıqarılğanını bildirdi. Putin, Rusiye sıñırına yaqın «RQM sistemasınıñ yerleştirilmesi kibi Rusiyege qarşı dostane olmağan adımlar» artıq «effektivligini ğayıp ettiler», dedi.
Fevralniñ 16-sında NATOnıñ baş kâtibi Yens Stoltenberg Rusiyeni, SSCB ile AQŞ arasındaki orta ve uzaq menzilli raketalarnı yoq etüv aqqında 1987 senesi añlaşmasınıñ kütülmesi meselesinde «açıq» olmağa davet etti.
Aynı şu künü o, NATOnıñ maqsadı, «nükleer silâsız dünya» olsa da, Alyans nükleer silâlı blok olmağa devam etecek, dep bildirdi. O, Rusiye, Çin ve Şimaliy Koreyanıñ nükleer silâsı olğan yerde, NATO nükleer silâsız qalamaz, dedi.
