Kremlniñ kontroli altında bulunğan Qırım ükümeti, Ukrainanıñ Rusiyege qarşı mahkeme davaları ve Kyivnıñ Qırım sakinleriniñ aqlarını sözde bozmasına cevaben «uquqiy aks-ucüm»ni teşkil ete. Bunı Qırım.Aqiqat Radiosı efirinde Qırımnıñ Rusiye ükümeti yanında halqara uquq meseleleri boyunca ekspertler şurasınıñ rehberi ve ondan ğayrı mahkeme davalarını azırlav boyunca iş gruppasınıñ yolbaşçısı Aleksandr Molohov bildirdi.
Rusiye adliyecisi: «Biz sadece uquqiy aks-ucüm teşkil etmege qarar berdik, çünki Ukraina Qırımğa ve Rusiyege qarşı olğan bu cebhede bayağı faaldir. Biz yalıñız susıp tursaq, özümizni aqlamağa tırışsaq, bu doğru olmaycaq, dep tüşündik. Bizde, Qırım sakinleriniñ aqları olğan tasil almaq aqqı, dolaşuv serbestligi, mal-mülk saibi olmaq aqqı, medeniy aqlarını iç şübhesiz bozğan Ukrainağa deliller olaraq kösterecek şeylerimiz bar. Umumen Qırım içün tatbiq etilgen sanktsiyalar adaletsizdir», – dedi.
Molohov, onıñ iş gruppası, yarımadanıñ suv qamaçavından zarar körgen Qırım balıq kombinatı adından Ukraina mahkemelerinde dava açmağa yardım etti, dep añlattı. Ondan ğayrı Rusiye adliyecisi, bu işnen Avropanıñ insan aqları boyunca mahkemesine ketmege azır olğanlarını bildirdi.
Fevralniñ 28-nde belli oldı ki, Kremlniñ kontroli altında olğan Qırım ükümeti, yarımadanıñ energetik qamaçavı içün Kyivge qarşı mahkeme davalarını azırlay.
2016 senesiniñ baarinde Rusiye energiya köpürinde üçünci yolağınıñ işletilip başlağanına baqmadan, Rusiye tarafından ilhaq etilgen Qırımda yarıqnıñ södürilmeleri ep devam ete. 2015 senesiniñ dekabrinden başlap, Herson vilâyetinde elektrik direginiñ zararlanması sebebinden Ukrainanıñ qıtadaki qısmından Qırımğa elektrik energiyanıñ berilmesi kesildi. Al-azırda Qırım öz generatsiyası, Rusiyeden ketirilgen generator tertibatları ve Kubandan keçirilgen energiya köpüri sayesinde elektroenergiyanen temin etile.
