Ukrainanıñ sabıq prezidenti Viktor Yanukoviç martnıñ 2-sinde Moskvada Rusiyeniñ TASS devlet agentliginde keçken matbuat konferentsiyasında «Qırımnıñ teslim etilmesi» sebebini añlattı. Bu hususta Azatlıq Radiosı yaza.
O: «Qırım ne içün teslim etildi? Öyle bir körüne, sanki ükümet Qırımnı Ukrainadan uzaqlaştırmaq içün, problemli territoriyadan qurtarılmaq içün er şeyni yaptı. Mahkemede ifade bergen şaatlar köz ögüne alınsa, akimiyetni zapt etkenler Qırımnı Ukrainada saqlap qalmaq içün areketler yapmadı, dep şübhesiz söylemek mumkün», – dedi.
Obolonskıy rayon mahkemesi 2017 senesi iyünniñ soñunda Ukrainanıñ sabıq prezidenti Viktor Yanukoviçniñ devletke hiyanetlik etkeninde qabaatlavları boyunca işni ğiyabiy şekilde baqıp başladı.
Yanukoviç Ukrainada bir qaç cinaiy işniñ ve bu cümleden 2013 senesiniñ noyabrinden 2014 senesiniñ fevraline qadar vekâletleriniñ arttırması, Meydanda faaliyetçilerniñ kütleviy surette öldürilmesi ve 2010 senesinde devlette akimiyetniñ zapt etmesi boyunca cinay işlerniñ figurantı ola.
Meydanda narazılıq köstergenler qurşunğa tutulğan soñ Rusiyege qaçqan Ukrainanıñ sabıq prezidenti özüne qarşı atılğan qabaatlavlarnı red ete.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
