Link açıqlığı

Saatnıñ esas haberi

Qırımda mahkeme birinci kere qırımtatarlarğa qol tutmaq içün yapılğan bir kişilik piketniñ iştirakçisi tarafından berilgen apellâtsion şikâyet boyunca musbet qarar çıqardı


Kremlniñ kontroli altında bulunğan Qırım Yuqarı mahkemesi martnıñ 2-sinde qırımtatarlarğa qol tutmaq içün yapılğan bir kişilik piketniñ iştirakçisi Rustem Mustafayev bergen istinaf şikâyeti boyunca musbet qarar çıqardı. Bu «Qırım birdemligi»niñ Facebookında bildirile.

Aynı zamanda aq-uquq qorçalayıcıları, Yuqarı mahkeme bir kişilik piketlerniñ diger iştirakçisi, Enver Mustafayev içün birinci maqam mahkemesiniñ qararını, yani 10000 ruble (4800 hrivna – QA) cöremeni deñiştirmeyip qaldırdı, dep qayd ettiler.

2017 senesi oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler yapıldı. Daa soñra Rusiye mahkemeleri bu piketlerniñ iştirakçilerine cöremeler tayin etti.

Piket iştirakçilerine qarşı, tayin etilgen piket ötkerüv tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesi, 5-nci qısım) memuriy protokollar tizildi.

Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları keçti. Qırım boyunca İçki işler nazirliginiñ ekspertiza merkezi tarafından «piketlerni umumiy maqsat, ğaye ve teşkil etüv birleştire» şeklinde berilgen hulâsa, qabaatlav tarafı içün esas delil oldı.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG