Martnıñ 1-nde Lübnandaki Ukraina elçihanesinde «Qırım aqşamı» keçti. Bunı Facebookta Qırımtatar Milliy Meclisi reisiniñ muavini İlmi Umerov yazdı.
Onıñ bildirgenine köre, tedbir Ukrainanıñ Lübnandaki elçisi İgor Ostaş tarafından teşkil etildi ve alıp barıldı. İlhaq etilgen Qırımdaki vaziyet aqqında qırımtatar halqınıñ lideri Mustafa Cemilev ve Umerov özü ikâye ettiler.
«Lenara Osmanovanıñ qısqa bir kontsertinden soñ «taraflar» bir-birine hediyelerini taqdim etti. Zal, Rustem Skibinniñ sergisinen bezetilgen edi. «Aqşam» sıcaq, «qoranta» şaraitinde ve Ukraina diasporasınıñ tam bir anşlagı ile keçti», – qayd etti Umerov.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
