Fevralniñ 26-sında Odesada Rusiye Baş konsullığı yanında faaliyetçiler Kremlniñ siyasiy mabüslerine qol tutmaq maqsadınen ötkerilgen «Birdemlikniñ 26 daqiqası» halqara tedbirine qatıldılar. Bunı Qırım.Aqiqat muhbiri bildire.
Beş faaliyetçi qollarındaki plakatlarnen 26 daqiqa turdılar. Olardan birinde Qırımda Ukraina tarafını tutqan faaliyetçilerniñ cinaiy işlerini tahqiq etken prokurorlar tarafından sözde tapılğan deliller tasvir etildi.
Tedbir esnasında faaliyetçiler: «İlhaqnıñ üç yılı içinde 43 kişi zornen alıp qaçıldı. Olarnıñ 19-ı azat etildi, 16-sı tapılmadı ve ğayıp olğan sayıla, 6-sı ölü tapıldı, 2 kişi azatlıqtan marum etüv yerlerinde tapılıp, daa soñra siyasiy sebeplernen açılğan cinaiy işler boyunca mahküm etildi. Talil esasında 36 vaqiada bu cinayetlerniñ işlenmesinde Rusiye devlet organlarınıñ iştirakine işaret etken faktlar tayin etildi», – dediler.
Kyivde Rusiye elçiligi yanında da fevralniñ 26-sında Ukraina siyasiy mabüslerine qol tutmaq maqsadınen ötkerilgen «Birdemlikniñ 26 daqiqası» tedbiri keçti. Tedbirni AQŞ Pen-klubu ile ortaqlıqta Vatandaş urriyetleri merkezi teşkil etti.
Ukrainada fevral 26 kününi «Qırımnıñ Rusiye işğaline muqavemeti künü» olaraq ilân etmege teklif eteler. 26 künü, Qırımnıñ Rusiye işğaline qarşı muqavemet künü olaraq tayin etildi. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait olğan faaliyetçiler tura edi.
Fevralniñ 26-sında Ukrainada ve büyün dünyada Qırım sakinlerine ve Ukrainanıñ topraq bütünligine qol tutmaq içün tedbirler, munaqaşalar, forumlar, mitingler ve numayışlar yapıla.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
