Ukraina-İndoneziya siyasiy mesleatlaşmalarnıñ dörtünci raundı esnasında Rusiyeniñ Ukrainağa qarşı silâlı tecavuzı, Ukraina devletiniñ suvereniteti ve topraq bütünligini qorçalav ve Qırımdaki Rusiye akimiyetine qırımtatar halqınıñ aq-uquqlarını bozmağa yol bermemek kerekligi meseleleri müzakere etildi. Bunı fevralniñ 23-nde Ukraina Tış işleri nazirliginiñ matbuat hizmeti bildire.
Bildirüvde: «Ukraina tarafı vaqtınca işğal etilgen Qırım territoriyasında qırımtatarlarğa qarşı aq-uquqlarnıñ qaba surette bozuluvlarına diqqatnı celp etti ve bu munasebetle İndoneziyanı, dünyada eñ büyük musulman devletlerinden biri sıfatında, cümleden diniy aqlarnıñ kütülmesi saasındaki vaziyetni bivasta surette közetmege davet etti.
Nazirlikte, körüşüvde ondan ğayrı Minsk añlaşmalarınıñ implementatsiyası, Ukraina ile İndoneziya arasındaki siyasiy dialognıñ faalleştirilmesi, ameliy saalarda emekdaşlıq köleminiñ arttırılması ve halqara saada emekdaşliqnıñ quvetleştirilmesi meseleleriniñ de muzakere etilgenini qayd ettiler.
Ukraina TİNi matbuat hizmetiniñ bildirüvinde, İndoneziya Cumhuriyeti TİNiniñ Amerika ve Avropa işleri boyunca baş mudiri Muhammed Anşori, İndoneziyanıñ Ukrainanen bütün yönelişlerde emekdaşlıq yapmağa azır olğanını qayd etti, denile.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
Ukraina TİNi, ilhaq etilgen yarımadada Qırım sakinlerine, musulmanlarğa qarşı yapılğan repressiyalarğa defalarca narazılıq kösterdi.
