Bağçasarayda Han sarayınıñ territoriyasında bulunğan Büyük Han camisiniñ ög tarafı çatladı. Bunı özüniñ Facebooktaki saifesinde Bağçasaray tarih ve medeniyet qoruğınıñ sabıq rehberi Elmira Ablâlimova bildirdi.
Ablâlimova: «Büyük Han camisi kün-künden daa da felâketli vaziyetke kele! Caminiñ şimal divarı çatladı. Anda armoquşaq ve kerişlerniñ ağırlığından çatlaqlar peyda oldı. Büyük ihtimal ile vitrajlar da bu sebepten çatladı! Bizni felâket – ög divarınıñ yıqılması bekley! Bu divarlar 500 yıldan ziyade turdı! Olarnı ne cenk, ne de vaqıt yıqtı – olarnı adamlar ve olarnıñ mıtlaq ahmaqlıq yıqalar!» – dep yazdı.
Qırımdaki Rusiye Medeniyet nazirliginiñ saytında ve Han sarayınıñ saytında caminiñ ög divarındaki çatlaqlar aqqında malümat yoq.
Bundan daa evel QMC milletlerara munasebetler ve sürgün etilgen vatandaşlarnıñ işleri boyunca komitetiniñ sabıq başlığı, Qırım faaliyetçisi Edem Dudakov, «rekonstruktsiya» neticesinde Bağçasaraydaki Han sarayından alıp taşlanğan kiramet ve ağaç kerişleriniñ Zıncırlı medrese mimarlıq abidesi territoriyasında tapılğanlarını bildirdi.
Faaliyetçiniñ malümatına köre, «rekonstruktsiya» esnasında Han sarayınıñ ağaç kerişleri mahv etildi. Bir qısmı pıçıldı ve daa bir qısmı alıp ketildi. Ondan ğayrı, Dudakovnıñ malümatına köre, restavratsiyanı becergen «Atta-grup» podrâdçı şirketi qadimiy kirametni İspaniyada eski tarzğa beñzetilip yasalğan yañısına deñiştirmege planlaştıra.
Ukraina Medeniyet nazirligi, Qırımnıñ Rusiye akimiyeti tarafından Bağçasaraydaki qoruq territoriyasında işlerniñ yapılması neticesinde Han sarayınıñ baş korpusı içün mahv etilüv telükesi bar.
2016 senesiniñ iyülinde Rusiyeniñ kontroli altında bulunğan Qırım akimiyeti yanındaki Medeniy mirasnı qoruv boyunca devlet konitetiniñ ilmiy-usuliy şurası yarımadanıñ bir qaç tarihiy obyektinde ve şu cümleden Bağçasaraydaki Han sarayında qazalarğa qarşı ilk nevbetteki işlerniñ yapılması aqqında kelişti.
Bağçasaraydaki Hansaray muzeyi – qırımtatarlarnıñ tarihı ile alâqalı olğan eñ belli muzey, Qırımlı Girey hanlarınıñ yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar.
