Devletke hiyanet etkeninde qabaatlanğan sabıq Ukraina prezidenti Viktor Yanukoviçniñ mahkemesi keçken Kyivdeki Obolonskıy rayon mahkemesinde şimdiki Ukraina prezidenti Petro Poroşenko 2014 senesiniñ fevralinde Qırımğa barğanı aqqında ikâye etti.
O, fevral 27-de, Ukraina prezidenti vazifesini eda etken Oleksandr Turçinovnıñ kabinetine kelgenini, ve o, Poroşenkoğa, Qırım Yuqarı Radası deputatlarınen şahsen muzakereler etip, «viran etici ceryannı» toqtatmaq içün uçaqnen Qırımğa barmaqnı teklif etkenini bildirdi.
Poroşenko, sorğu esnasında: «Aqmescitke kelgenimde o, endi qamaçavğa alınğan edi. Er yerde arbiy uniformalı adamlar buluna edi. Bir qaç adam meni toqtatacaq oldı, qavğa başlandı, men qamaçav safını yarıp keçtim… O zaman men, beyanat etip, Qırım Ukrainanıñkidir, ve biz provakatsiyalarğa yol bermemek içün er şeyni yapmaq kerekmiz, dedim. Biz, bütün meselelerni çezmek içün QMC Yuqarı Radasınıñ deputatlarınen birlikte iş grubunı meydanğa ketirmege azır edik. Biz spiker Vladimir Konstantinovnen körüşüv aqqında añlaştıq», – dedi.
Ukraina prezidenti, Qırım MC Yuqarı Radasına kirecek olğanda yolunda «yeşil adamçıqlar» turğanını añlattı.
Poroşenko: «İnsanlarnıñ bir qısmı provakatorlar edi. Olar meni qorquzacaq oldılar», – dedi.
Fevralniñ 18-nde Poroşenko, sabıq prezident Yanukoviçniñ devletke hiyanetlikte qabaatlavlarına dair cinaiy işniñ baqılması boyunca mahkeme oturışuvında iştirak etecegini bildirdi.
2014 senesiniñ fevralinde Poroşenko, Ukraina halq deputatı sıfatında, Qırım parlamentiniñ deputatlarınen muzakereler yapmaq içün uçaqnen Qırımğa keldi. Aqmescit ava limanınıñ çıqışında silâlı «özüni mudafaanıñ uruşmacıları» Poroşenkonıñ yardımcılarını toqtatacaq oldılar, lâkin bu teşebbüs netice bermedi. Daa soñra kelecekteki Ukraina prezidenti QMC Yuqarı Radasına yol aldı. Anda, basamaqlarda, qalabalıq oña ıslıq çaldı. Muzakereler ise iç bir netice bermedi.
Obolonskıy rayon mahkemesi 2017 senesi iyünniñ soñunda Ukrainanıñ sabıq prezidenti Viktor Yanukoviçniñ devletke hiyanetlik etkeninde qabaatlavları boyunca işni ğiyabiy şekilde baqıp başladı. Meydandaki vaqialar ayrı bir iş boyunca baqılalar.
Meydanda adamlar atıp öldürilgen soñ Rusiyege qaçqan Ukrainanıñ sabıq prezidenti Viktor Yanukoviç bütün qabaatlavlarnı red ete.
