Qırım Muhtar Cumhuriyeti Prokuraturası, fevralniñ 21-nde Herson şeer mahkemesiniñ Rusiye tarafından ilhaq etilgen Qırımğa ilmenit madenini alıp barğanından şübheli tanılğan Ukraina gemisini tevqif etkenini bildire.
Nezaret etici muessiseniñ bildirgenine köre, mahkeme QMC prokuraturasınıñ gemini tevqif etilmesi aqqında muracaatı boyunca musbet qarar aldı.
Muessise, QMC prokurorı Gündüz Mamedovnıñ sözlerini naqil etip: «Bu, tevqif etilgen gemilerniñ endi dörtüncisidir. Lâkin Qırımnıñ qapalı limanlarına qanunsız kirgen diger deñiz gemilerinden farqlı olaraq, tahqiqatnıñ malümatlarına köre, «Nefterudovoz 45» gemisiniñ «Kavkaz» limanı yolunen Qırım Muhtar Cumhuriyeti territoriyasına ilmenit madeniniñ qanunsız ketirilmesine alâqası bar», – dep bildire.
Onıñ aytqanına köre, «mahkeme vesiqalarınıñ ve trafik serveriniñ ögrenilmesi Ukrainalı gemi saibiniñ qanunsız faaliyetini tasdiqlamağa ve devletimizniñ iqtisadiy menfaatlarını qorçalamağa imkân berecek».
Fevralniñ 17-sinde kütleviy haber vastaları, Kerç boğazına ilmenit madeniniñ alıp barmasından şübheli tanılğan «Nefterudovoz 45» gemisiniñ Ukraina bayrağı altında Hersonğa qaytqanını bildirdiler. KHVniñ malümatlarına köre, Qırımda ilmenitni hammadde olaraq qullanğan yekâne işhane, Ukrainalı iş adamı Dmitriy Firtaşnıñ «Krımskiy titan» işhanesidir.
Aynı şu künü Ukraina telükesizlik hizmeti ve Ukraina Devlet sıñır hizmetiniñ hadimleri «Nefterudovoz 45» gemisini tinttiler.
Ukrainanıñ registrine köre, «Nefterudovoz 45» gemisi, qurucısı Odessalı Maksim Molçanov olğan Hersondaki OOO «Transportnıy sudohodnıy menedjment» şirketine ait.
«Nefterudovoz 45» gemisiniñ vekilleri tarafından şimdilik açıq menbalarda izaatlar berilmedi.
2014 senesiniñ iyülinden başlap, Ukraina ükümeti Rusiye tarafından ilhaq etilgen Qırımdaki bütün limanlarnıñ çalışmasını resmen toqtattı. Yarımadanıñ limanları halqara deñiz naqliyatı içün qapalı.
