Link açıqlığı

Saatnıñ esas haberi

Aqmescitte mahkeme qırımtatarlarğa qol tutmaq içün yapılğan bir kişilik piketniñ iştirakçisine tayin etilgen cöremeni lâğu etti


Kremlniñ kontroli altında bulunğan Qırım Yuqarı mahkemesi qırımtatarlarğa qol tutmaq içün yapılğan bir kişilik piketniñ iştirakçisi Memet Lümanovğa cöremeni tayin emek aqqında qararnı lâğu etti.

«Qırım birdemligi» cemiyet birleşmesiniñ fevral 20-de Facebookta bildirgenine köre, cöremeniñ tayin etilmesi aqqında iş «işlenip bitirilmesi ve hatalarınıñ tüzetilmesi içün» birinci maqam mahkemesine qaytarıldı.

Memet Lümanov, 2017 senesi oktâbrniñ 14-nde yarımadada Rusiye telükesizlik hadimleriniñ repressiyalarına qarşı ötkerilgen bir kişilik piketlerniñ iştirakçilerinden biri edi. Oña 10 biñ ruble (4,7 biñ hrivna) miqdarında cöreme tayin etildi.

Oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.

Piket iştirakçilerine qarşı, piketniñ ötkerilmesine dair tayin etilgen tertipni bozğanları içün (Rusiyeniñ Memuriy tertip bozuv aqqında kodeksi, 20.2 maddesi, 5-nci qısım) memuriy protokollar tizildi.

Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları keçti. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG