Yanvar 28-de Qırımtatar faaliyetçisi Giray Kulametov, 2012 senesinde içtimaiy ağda video rolikni derc etkeni içün tayin etilgen on künlük apisinden soñ Qarasuvbazar muvaqqat tutuluv izolâtorından çıqtı. Bunı Facebookta «Qırım birdemligi»niñ faaliyetçileri bildire.
Yanvar 18-de Kremlniñ kontroli altında bulunğan İslâm Terek (Kirovskoye) rayon mahkemesi yanvarniñ 18-nde Eski Qırımda evinde yapılğan tintüvden soñ yaqalanğan Giray Kulametovnıñ işini baqıp çıqtı. Kulametovnı «ekstremistik teşkilâtlarnıñ sıfatları ve simvollarını propaganda etüv»de qabaatladılar.
İlhaqtan soñ Qırımnıñ ameldeki Rusiye akimiyeti tarafından mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapıla.
