Yanvarniñ 24-nde Aqmescit rayonınıñ Novıy Mir köyünde tintüvden soñ yaqalanğan qırımtatar İsmail Ramazanovnı degil yalıñız köteklemek, aynı zamanda tıbbiy yardım köstermeyip, aşsız ve suvsuz 40 saat tuttılar. Bunı «Qırım birdemligi»niñ faaliyetçisi Server Mustafayev bildire. Bu malümatnı o, yanvarniñ 25-nde Qırım.Aqiqat Radiosınıñ canlı yayınında paylaştı.
Faaliyetçi: «İsmail Ramazanovnı, sağlığınıñ vaziyetine baqmadan, telükeli ilân etip, ev apisine yibermediler. Malümatımızğa köre, oña aman-aman 40 saat aş ve suv bermediler. Aqrabaları ile faaliyetçiler ise onı Aqmescitteki tahqiqat izolâtorında tapmağance, ne yerde olğanını bile bilmediler. Oña aş, sıcaq urba berecek oldılar, lâkin şeyler, ihtimal ile, oña öyle de irişmedi. Daa soñra mahkemege «acele yardım» çağırıldı, amma o, şay de kelmedi. İsmail Ramazanov ayaqta zornen turdı, zornen laf ete edi», – dep qayd etti.
Yanvarniñ 24-nde mahkeme oturışuvı esnasında Aqmescit rayonınıñ Novıy Mir köyünde tintüvden soñ yaqalanğan qırımtatar İsmail Ramazanov, Rusiye FSBsiniñ Qırım boyunca idaresiniñ hadimleri tarafından köteklengenini bildirdi.
Aqmescit rayonınıñ Novıy Mir köyünde tintüvden soñ yaqalanğan qırımtatar İsmail Ramazanovnı, milletlerara zıddiyet ve dinlerara nefretni qozğatqan malümatlarnıñ darqatılmasında qabaatlaylar. Rusiye telükesizlik hadimleriniñ versiyasına köre, o, Zello internet-radiosı vastasınen malümatnı kenişlete edi.
Yanvarniñ 23-nde Rusiye telükesizlik hadimleri ilhaq etilgen Qırımnıñ Aqmescit ve Kirov rayonlarında tintüvler ötkerdi. O vaqıt Novıy Mirde ekstremizniñ propagandasında qabaatlanğan qırımtatar İsmail Ramazanovnıñ evinde tintüv yapıldı.
Daa soñra Rusiyeniñ Qırım boyunca Tahqiqat komitetinde, tergevciler internet-radio vastasınen ekstremistik materiallarnıñ darqatılmasında qabaatlanğan Aqmescit rayonı sakinine qarşı cinaiy iş açqanları aqqında bildirdiler.
İlhaqtan soñ Qırımda Rusiyeniñ amelde akimiyeti mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapa.
