Aqmescitte İ. Gasprinskiy adına Cumhuriyet qırımtatar kitaphanesinde qırımtatar yazıcısı, publitsisti, tercimanı Ayder Osmannıñ doğğanına 80 yıl toluvı munasebetinen hatıra aqşamı ötkerildi.
Qırımnıñ Rusiye Medeniyet nazirliginiñ bildirgenine köre, tedbir «Edebiy yılname» marafınınıñ bir sıra edebiy vaqiaları çerçivesinde ötkerildi.
Muessisede, tedbirde yazıcılar Uriye Edemova ve Ablâziz Veliyev, jurnalistler Server Bekirov ve Dilâver Osman, edebiyatşınas, filologiya ilimleri namzeti Şevket Yunusov, cemiyet teşkilâtlarınıñ vekilleri ve kitaphane oquyıcıları iştirak etti, dep qayd ettiler.
Bildirüvde: «Qırımtatar yazıcıları birligi reisi Uriye Edemova, Ayder Osmannıñ qırımtatar halqınıñ edebiy hazinesine pek çoq cevherler – ustalıqnen yazılğan teren manalı eserler qoşqanını qayd etti», – denile.
Yazıcı Ablâziz Veliyev, Ayder Osman «qırımtatar, özbek ve rus tillerinde aynı yüksek seviyede yazdı, bediiy tercimeniñ ustası edi», dedi.
Bildirilgenine köre, kitaphane hadimleri Ayder Osmanğa bağışlanğan kitap sergisini taqdim ettiler. Onda muellifniñ kitapları, jurnallarda derc etilgen eserleri, onıñ ayatı ve icadı aqqında maqaleler, nadir kitaplar ve kitap abideleri bölüginiñ fondundan alınğan materiallar taqdim etildi.
Qırımtatar yazıcısı, muarrir, terciman Ayder Osman 1938 senei yanvarinde Qırımda Seyitler (Nijnegorskiy) rayonınıñ Beşqurtqa-Vaqıf köyünde doğdı. 1944 senesinde o, qorantası ile beraber Ferğana rayonınıñ Altıarıq denilgen yerine sürgün etildi. 1985 senesinden başlap «Yıldız» jurnalınıñ baş muarriri vazifesinde çalıştı. 1987 senesinde Özbekistannıñ Yazıcılar birligi yanındaki Qırımtatar edebiyatı boyunca keñeşniñ reisi olaraq saylandı. 1991 senesinde jurnalnıñ hadimlerini Qırımğa köçürdi. Aqmescitte yaşadı. 1997 senesi iyünniñ 20-sinde dünyadan ketti.
