Link açıqlığı

Saatnıñ esas haberi

Kefede qırımtatar faaliyetçisi Suleyman Kadırovnıñ işi boyunca FSB hadimini sorğuladılar


Advokat Aleksey Ladin ve Suleyman Kadırov mahkemeniñ oturışuvında, 2018 senesi yanvar 22 künü
Advokat Aleksey Ladin ve Suleyman Kadırov mahkemeniñ oturışuvında, 2018 senesi yanvar 22 künü

Rusiyeniñ kontroli altında bulunğan Kefe şeer mahkemesinde qırımtatar faaliyetçisi Suleyman Kadırovnıñ işi boyunca oturışuvda qabaatlav tarafınıñ şaatı olaraq Qırım FSB idaresiniñ tehnika mutehassısı Aleksandr Vişnânı sorğuladılar.

Qırım.Aqiqat muhbiriniñ bildirgenine köre, sorğulanğan telükesizlik hadimi «Kadırovnıñ Facebooktaki saifesiniñ közden keçirilmesinde» iştirak etti. FSBniñ versiyasına köre, Kadırov anda «Qırım» göñülliler batalyonınıñ meydanğa ketirilmesi aqqında yazğan ve buña para ayırmağa rica etken nasıldır Demyan Demyançenkoğa ait videosınıñ linkini yerleştirdi.

Vişnâ: «2017 senesi martnıñ soñunda men, operativ vekil Dolgaçov Vâçeslav Yevgenyeviç tarafından operativ areketlerge celp etildim. Kadırov arqadaşnıñ saifesine kiriş yapıldı. Saifede «Novıy batalyon. Sbor sredstv» («Yañı batalyon. Para toplav») faylı asuvlı edi. Muellifi Demyan Demyançenko. İyülde men bu saifeniñ közden keçirilmesi içün daa bir kere celp etildim. Anda Kadırov arqadaşınıñ, o, rolik muellifi ile tamamile razı olğanına dair izaatı ve «Qırım er vaqıt Ukrainanki edi ve şimi de böyle qalmaqta» şeklinde ifadesi peyda oldılar», – dep, bildirdi.

Tehnika mutehassısı mahkemede, içtimaiy ağnıñ qullanıcısında «tehnikiy ceetten repost ya da linkni muellifke ait posttan ayırmaq imkânı yoq», dedi.

FSB mutehassısı mahkemede: «Soñki ziyaretçi içün link ya da repost bir-birinden ayırılmaylar. İç bir qullanıcı, bu repostmı ya da saifeniñ muellifi özü bu postnı yerleştirdimi tayin etalmaz. Standart funktsiyalarğa köre, qullanıcı bu saifedeki videonı başqa bir sayt ya da başqa saifege keçmeyip baqa», – dep iddia etti.

Ondan ğayrı mahkemede qorçalav tarafınıñ şaatları – Ukraina İçki işler nazirligi organlarında Kadırovnen beraber çalışqan işdeşi, Kefe şeer poliklinikasınıñ bir tıbbiyet hadimi ve tanışları sorğulandı. Olar Kadırovnı musbet olaraq tavsif etti. Aynı zamanda şaatlar, Kadırov Qırımnıñ aitligine dair noqtai-nazarını hususiy suhbetlerde iç bir vaqıt gizlemedi, lâkin cemaat içinde öz fikrini ifade etmedi, dediler.

Eki şaat mahkemege kelemedi. – Kadırovnıñ soyu Ravi Abibelayev sağlığınıñ vaziyeti munasebeti ile kelmedi. FSB hadimi Miroşniçenko ise «vaziyeti stabil olmağan bölgede hizmet yolculığında buluna». Akem hanım Abibulayevniñ ifadelerini oqudı, Miroşniçenkonıñ ise hizmet yolculığından qaytqanını beklemege qarar berdiler.

Şaatlar sorğulanğan soñ mahkeme işniñ malzemelerini ögrenip başladı.

Mahkemeniñ nevbetteki oturışuvı fevral 12 künü saat 10:00-ğa tayin etildi. Akem, Rusiye FSBsiniñ tahqiqatı içün ekspertizalarnı azırlağan ekspertler ile tahqiqatniñ ekspertizası boyunca hulâsa çıqarğan qorçalav ekspertlerini mahkemege davet etip, sorğulanmalarına dair qarar berdi.

Rusiye telükesizlik hadimleri 2016 senesi oktâbrniñ 5-nde qırımtatar faaliyetçisi Suleyman Kadırovnıñ evine tintüv etmek içün keldiler. Tintüv esnasında evinden noutbuk ve telefon alındı. Kadırov, Rusiye sıñırlarını tanımamağa davet etkeninden ve «Asker» cemiyet birleşmesine qol tutqanından şubheli tanıldı.

2016 senesi oktâbrniñ 11-nde Kadırovğa qarşı «separatizm» şübhesi ile cinaiy iş açıldı. 2017 senesi aprelinde Rusiyeniñ maliye monitoringi boyunca hizmeti Kadırovnı ekstremistler ve terroristler cedveline kirsetti.

Kadırov özü bu cinaiy işke, onıñ cemiyet içinde faal surette ifadelegen noqtai-nazarı ve aq-uquqnı qorçalav saasındaki faaliyetlerine qarşı mahsus hizmetlerniñ profvakatsiyası, dey.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG