Eski Qırımda tintüvden soñ tevqif etilgen qırımtatar faaliyetçisi Giray Kulametovğa yanvarniñ 19-nda pervasız olmağan adamlar ihtiyacı olğan şeylerni ketireler. Bunı Facebookta «Qırım birdemligi» birleşmesiniñ iştirakçileri bildire.
Faaliyetçiler: «Qarasuvbazar Muvaqqat izolâtorınıñ hadimleri musulmanlar, qırımtatarlarnıñ ayatında birlik, qol tutuv, sadıq dostnıñ omuzı ne olğanını daa bir kere is etti. Tünevin sözde «ekstremistik materiallar»nıñ derc etilmesi içün 10 künge apis etilgen 27 yaşlı Giray Kulametovnı bugün dostları ve pervasız olmağan adamlar bir top ihtiyacı olğan şeylerniñ paketleri altında «kömdiler», – dep yazalar.
Ondan ğayrı, insanlar içtimaiy ağlarda da qol tutuv bildireler.
Kremlniñ kontroli altında bulunğan İslâm Terek (Kirovskiy) rayon mahkemesi yanvarniñ 18-nde Eski Qırımda evinde tintüv yapılğan soñ yaqalanğan ve Rusiyeniñ memuriy uquq bozuvları aqqında kodeksiniñ 20.3 maddesi (1-nci qısım) boyunca qabaatlanğan qırımtatar faaliyetçisi Giray Kulametovnıñ işini baqıp çıqtı. Mahkeme «2012 senesinde videorolikni derc etken içün» Kulambetovğa 10 kün apis şeklinde cezanı tayin etti.
Yerli sakinler, yaqalanğanğa qol tutmaq içün mahkeme binasınıñ yanına keldi.
Kulametov, 2017 senesi oktâbrniñ 4-nde telükesizlik hadimleri tarafından qırımtatarlarğa, musulmanlarğa qarşı yapılğan repressiyalarğa narazılıq köstermek maqsadınen ötkerilgen bir sıra bir kişilik piketlerde iştirak etti. Daa soñra Rusiye mahkemeleri bu piketlerniñ iştirakçilerine cöremeler tayin etti.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübheli tanılğan Qırım musulmanlarınıñ evlerinde ketken sayın daa sıq surette tintüvler yapıla.
