Kremlniñ kontroli altında bulunğan İslâm Terek (Kirovskiy) rayon mahkemesi yanvarniñ 18-nde evinde tintüv yapılğan soñ Eski Qırımda yaqalanğan ve Rusiyeniñ memuriy uquq bozuvları aqqında kodeksiniñ 20.3 maddesi (1-nci qısım) boyunca qabaatlanğan qırımtatar faaliyetçisi Giray Kulametovnıñ işini baqıp çıqtı. «Qırım birdemligi» cemiyet birleşmesi Facebookta, mahkeme «2012 senesinde videorolikni derc etken içün» Kulambetovğa 10 kün apis şeklinde cezanı tayin etti, dep bildire.
Faaliyetçini «ekstremistik teşkilâtlarnıñ sıfatları ve simvollarını propaganda etüv»de qabaatladılar. Mahkemede onı cemiyet qorçalayıcıları Mustafa Seydaliyev ve Enver Alimov qorçaladılar.
Yerli sakinler, yaqalanğanğa qol tutmaq içün mahkeme binasınıñ yanına keldi.
Yanvar 18 sabasında Rusiye telükesizlik hadimleriniñ, evinde tintüv ötkerilgen qırımtatar faaliyetçisi Giray Kulametovnı yaqalap, alıp ketkenleri belli oldı. Kulametov, 2017 senesi oktâbrniñ 4-nde telükesizlik hadimleri tarafından qırımtatarlarğa, musulmanlarğa qarşı yapılğan repressiyalarğa narazılıq köstermek maqsadınen ötkerilgen bir sıra bir kişilik piketlerde iştirak etti. Daa soñra Rusiye mahkemeleri bu piketlerniñ iştirakçilerine cöremeler tayin etti.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
