Link açıqlığı

Rusiyede Qırım aqqında bir parça içün tarih dersliklerini yañı ekspertizağa yolladılar


Rusiyeniñ Tasil ve ilim nazirligi, Qırım aqqında sözlerinden dolayı Rusiyedeki Federatsiya şurasınıñ spikeri Valentina Matviyenkonıñ tenqidine oğrağan doquzıncı sınıf içün eñ yañı Rusiye tarihı dersligini qoşumça ekspertizağa yolladı.

Rusiye kütleviy haber vastalarınıñ yanvarniñ 11-nde bildirgenlerine köre, bu qarar Tasil nazirliginiñ derslikler boyunca ilmiy-usuliy şurasınıñ oturışuvnıda qabul etildi. 19 kişi ekspertiza içün rey berdi, 2 kişi bitaraf qaldı.

«İnterfaks»niñ malümatına köre, bildirüvlerde «Rusiye tarihi: XX asırnıñ başı – XXI asırnıñ başı» («İstoriya Rossiyi: naçalo XX – naçalo XXI veka») dersligi aqqında söz yürsetile. Derslikniñ ekspertizasını Rusiye ilimler akademiyası yapacaq. Onıñ hulâsaları Rusiye nazirligine yanvarniñ soñunace taqdim etilecek.

2017 senesiniñ oktâbrinde Qırımdan senator olğan Sergey Tsekov derslikni özüniñ plenar çıqışında añdı. O, Qırımda Rusiyeniñ ilhaqı aqqında şu parçanı oqudı: «Kiyevde başlağan inqilâp halqara siyasetniñ vaqiası oldı ve inqilâbiy dalğada diger tarafqa yaldap başlağan Qırımnı çıqarıp çetke attı».

Rusiye parlamentindeki yuqarı palatasınıñ reisi Valentina Matviyenko, bu parçağa «provakatsion» dep, Federatsiya şurasınıñ tasil ve ilim boyunca komitetine tarih derslikleriniñ Qırımğa dair bölüklerini teşkermege teklif etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG