Yanvarnıñ 7-sinde Moskva (Rusiye) ve Çikagoda (AQŞ) faaliyetçiler, birlikte, bir-birine parallel olaraq fleşmob tedbirini ötkerip, onıñ esnasında Suriyedeki arbiy areketlerniñ toqtatılmasını talap etti ve Rusiye tarafından ilhaq etilgen Qırımğa qol tuttılar. Bunı Qırım.Aqiqatqa Moskvadaki tedbirniñ iştirakçisi Vera Lavreşina ikâye etti.
Faaliyetçiler Rusiye paytahtınıñ soqaqlarına, cümleden, «Suriyede, Ukrainada, Gürcistanda cenkni toqtatıñız» ve «Kerçek terroristler Qırım musulmanları degil de, Kremldeki istilâcılar» şiarlarınen çıqtılar. Çikagoda ukrainlerniñ Noelge has urbalarını kiygen iştirakçiler «Russia out of Crimea» daveti ile çıqtılar.
AQŞta faaliyetçilerni Devid Turpin topladı.
Rusiyeniñ paytahtında endi bir yıldan ziyade sürgen muddet içinde Qırım ve qırımtatarlarğa qol tutmaq maqsadınen tedbirler ötkergen Moskva faaliyetçisi Lavreşina, teessuratları ile paylaşıp: «Çikagoda yaşağan Devid bizge Asadsız ve Putinsiz Suriye içün (dünya boyunca) fleşmobğa qatılmaqnı teklif etti. Biz de bunı mında, Moskvadaki Zemlânoy valda yaptıq. O ise, buña cevaben, «jovto-blakitnıy» (sarılı-mavılı – QA) bayraqları ile ukrain faaliyetçilerini ketirdi, ve olar Ukrainanıñ Qırımı içün tedbirge qatıldılar. Acayip şey, olar – anda ve biz – mında, bir tedbirde edik!», – dedi.
Rusiyeniñ muhalefet faaliyetçileri siyasiy mabüslerni azat etmek, Rusiyeniñ Ukrainağa qarşı tecavuzını ve Qırımda işğal rejimini toqtatmaq talaplarınen barışıqlı piketler ve tedbirlerge muntazam surette çıqalar.
Sankt-Peterburg ve Moskvanıñ faaliyetçileri, qırımtatarlarnıñ 1944 senesi mayıs 18-nde sürgün etilüvi hatırasına «Strategiya-18» dep adlandırılğan muddetsiz tedbir içün birleştiler. Faaliyetçiler ilhaq etilgen Qırımdaki vaziyetni tanıtmaq, Rusiye cemaatına insan aq-uquqları ve ürriyetleriniñ bozuluvı vaqiaları aqqında haber bermek içün er aynıñ 18-nci künü şeerniñ soqaqlarına çıqalar.
