Link açıqlığı

Saatnıñ esas haberi

Faaliyetçiler Rusiye restavratorlarınıñ Bağçasaray qoruğı territoriyasında Han sarayındaki işlerine şikâyet etmege davet eteler


Saraynıñ territoriyasında yapılğan işler
Saraynıñ territoriyasında yapılğan işler

Qırım faaliyetçileri içtimaiy ağlarda internet qullanıcılarğa «Bağçasaray tarih ve medeniyet qoruğı»nıñ territoriyasında Rusiye restavratorları tarafından yapılğan işlerge qarşı şikâyet qaldırmaq ricasınen muracaat eteler. Muracaatnı saraynıñ Facebooktaki saifesinde qaldırmaqnı rica eteler.

Faaliyetçilerniñ muracaatında: «Lütfen, Bağçasaraydaki han sarayınıñ restavratsiya adı altında mahv etilmesine qarşı öz narazılığıñıznı bildiriñiz», – denile.

Ukraina Medeniyet nazirligi, Qırımnıñ Rusiye akimiyeti tarafından Bağçasaray qoruğınıñ territoriyasında yapılğan işler neticesine Han sarayınıñ baş binası içün dağıluv telükesi bar, dep iddia ete.

Qırımnıñ Rusiye akimiyeti bu qabaatlavlarnı red etip, işlerniñ devam etilmesi aqqında bildire.

QMC Milletlerara munasebetler ve sürgün etilgen vatandaşlarnıñ işleri boyunca Cumhuriyet komitetiniñ sabıq rehberi Edem Dudakov, işler yapılğan yerni ziyaret etip, Qırımdaki Rusiye akimiyeti tarafından yapılğan keyfiyetsiz restavratsiya işleri neticesinde Bağçasaraydaki Han sarayı UNESCOnıñ dünya mirası obyektleri cedveline kirmek imkânını tamamı ile ğayıp etti, dep bildirdi.

Bağçasaraydaki Han sarayı, Suvdağdaki Ceneviz qalesi, Qırım astrofizik observatoriyası (rasadhanesi), Mangup-qale, Eski-kermen ve Çufut-qale UNESCOnıñ Dünya mirası obyektleri cedveline kirsetilmesi içün namzet olalar.

Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımnıñ Girey hanlarınıñ yazlıq rezidentiyası yeri. Muzey kompleskiniñ territoriyasında saray, harem binası, han mezarlığı ve cami bulunalar.

XS
SM
MD
LG